अन्तरिम संविधानमै सहमतीय र बहुमतीय प्रणालीको स्पष्ट ब्यवस्था रहेकाले संविधान संशोधन गर्नु जरुरी छैनः कांग्रेस           (२०६७ ज्येष्ठ ६, बुधवार)

काठमाडौ, जेष्ठ ५ - नेपाली कांग्रेसले अन्तरिम संविधानमै सहमतीय र बहुमतीय प्रणालीको स्पष्ट ब्यवस्था रहेकाले त्यस बिषयमा संविधान संशोधन गरिरहनुनपर्ने बताएको छ । माओवादीले सहमतीय प्रणालीमा मात्रै सरकार निर्माण हुने गरी संविधान संशोधन हुनुपर्ने माग राख्नु औचित्यहीन रहेको कांग्रेसले बताएको छ ।

'संविधानको धारा ३८ को १ मा सहमतीय सरकार र २ मा बहुमतीय सरकारको स्पष्ट ब्यवस्था छ', कांग्रेस कार्यवाहक सभापति सुशील कोइरालाको निवासमा बुधबार बसेको केन्द्रीय पदाधिकारीको अनौपचारिक बैठकपछि प्रवक्ता अर्जुननरसिंह केसीले संवाददाताहरुसँग भने, 'सहमति हुन नसके देश सरकारविहीन त भएर बस्दैन नि । यो बिषयमा संविधान संशोधन गर्नुको औचित्य छैन् ।'

उनले काम र कार्यान्वयनमा सहमति खोजिनुपर्ने बताउदै शुन्यतामा सहमति हुन नसक्ने बताए । शान्ति प्रकृया र संविधान निर्माणको शुनिश्चितता गर्न प्याकेजमा सहमति हुनुपर्ने अडान पार्टीले परिवर्तन नगरेको बताउदै उनले सुरक्षा अंगको स्थापित मापदण्ड नाघेर लडाकु समायोजन हुन नसक्ने पनि बताए ।

बैठकमा माओवादी नेतृत्वसँग मंगलबार भएको छलफलको समिक्षा भएको जानकारी दिदै उनले निश्चित उदेश्यका लागि मात्र सहमतीय सरकारको औचित्य पुष्टि हुने उनले बताए ।