उत्तर कोरियाको रकेट परिक्षण योजनाको विवादकाबीच अमेरिकी राष्ट्रपति बाराक ओबामा परमाणु सम्मेलनमा भाग लिन दक्षिण कोरिया पुग्नु भएको छ ।

 

कोरिया भ्रमणको शुरु मै ओबामाले दुई कोरिया विभाजन गर्ने गैर सैनिक क्षेत्रको भ्रमण गर्नु भएको छ । भ्रमणका क्रममा उहांले दक्षिण कोरिया तर्फको निरिक्षण पोष्टमा पुगेर त्यहां रहेका अमेरिकी सेनासंग भेट गर्नु भयो । अमेरिकी सेनासंगको भेटमा ओबामाले अमेरिकी सेनाले “स्वतन्त्रताको सीमा” रक्षा गरिरहेको भन्दै उनीहरुको सराहना गर्नु भयो । सन् १९५३ मा कोरिया युद्धको अन्त्य पछि कोरियाली प्रायद्धिपलाई विभाजन गर्ने गैर सैनिक क्षेत्रमा ओबामाको यो पहिलो भ्रमण हो ।

 

यता परमाणु सम्मेलनमा अमेरिका लगायत विश्वका ५० भन्दा बढी मुलुकका प्रतिनिधिहरुको सहभागिता रहने छ । तर उत्तर कोरियाले भने भाग लिएको छैन् । सम्मेलनमा आपराधिक र लडाकु समुहहरुलाई परमाणु हतियार पाउनबाट कसरी रोक्न सकिन्छ भन्ने विषयमा छलफल केन्द्रित रहने बताइएको छ ।

 

सम्मेलनमा प्योङयाङको परमाणु कार्यक्रम आधिकारीक एजेण्डामा नभए पनि द्धिपक्षित वार्ताहरुमा भने यो विषयले प्राथमिकता पाउने अनुमान गरिएको छ । उत्तर कोरियाले रकेट परिक्षणको बहानामा मिसायल परिक्षण गर्न लागेको भन्दै अमेरिकाले चिन्ता जनाइरहेको छ । तर प्योङयाङले स्याटलाइट अन्तरिक्षमा स्थापित गर्न रकेट परिक्षण गरिन लागेको बताएको छ ।