बम विस्फोट गराएको आशंकामा पाँच जना पक्राउ,नेपालगन्ज बन्द           (२०६७ पौष १६, विहीवार)

बाँके (खजुरा), पुस १५- नेपालगन्जको पुष्पलाल चोकमा रहेको गौरीशङ्कर हार्डवेयरमा बम विष्फोट गराएको आशङ्कामा प्रहरीले पाँचजनालाई पक्राउ गरेको छ। नेपाल-भारत सीमा नजिकबाट उनीहरुलाई पक्राउ गरिएको बाँकेका प्रहरी नायब उपरीक्षक विनोद घिमिरेले बताए।

सो घटनाको अनुसन्धान भइरहेकाले उनीहरुको नाम सार्वजनिक गरिएको छैन। त्यसैगरी व्यापारिक प्रतिष्ठानमा गराइएको बम विष्फोट घटनाको विरोधमा नेपालगन्जका व्यापारीहरुले आज बजार बन्द गराएका छन्।

त्यसैगरी सो घटनाप्रति स्थानीय शान्ति समिति बाँके र जिल्लाका विभिन्न राजनितिक दलहरुले गम्भीर ध्यानाकर्षण भएको जनाएका छन्।

समितिका संयोजक डम्बरबहादुर विकले आज एक प्रेस विज्ञप्ति निकालेर यस्ता घटनाले जिल्लाको शान्ति सुरक्षा र मानव अधिकारको अवस्था कमजोर भएको भन्दै सर्वसाधारणलाई लक्षित गरी भएको यस्तो आतङ्ककारी घटनामा जो कसैको संलग्नता भए पनि क्षम्य नहुने उल्लेख गरेका छन्।

त्यसैगरी एकीकृत नेकपा (माओवादी), नेपाली काँग्रेस, नेकपा (एमाले), तमलोपा, मधेसी जनअधिकार फोरम, नेपाल सद्भावना, सद्भावना आनन्ददेवी, राष्ट्रिय जनमोर्चा, नेमाकिपाले आज सयुक्त विज्ञप्ति निकालेर घटनाको गम्भीर अनुसन्धान गरी दोषीलाई कानुनको दायरामा ल्याउन सरकार तथा स्थानीय प्रशासनसँग माग गरिएको छ।

हिजो अपरान्ह भएको विस्फोटमा परी हार्डवयेरका सञ्चालक कारकादो-५ का ४२ वर्षीय दीर्घराज भनिने कौशल आचार्यसहित चारजना घाइते भएका थिए। रासस