फ्रान्समा आज हुने दोस्रो चरणको निर्वाचनमा बर्तमान राष्ट्रपति निकोलस सार्कोजी र समाजवादी नेता फ्रान्कोईस होलिण्डेवीच कडा प्रतिस्पर्धा हुने भएको छ । समाजवादी नेता होलिण्डेले चुनावमा जीत हासिल गर्ने आकलन गरिएको छ ।

 

होलिण्डे निर्वाचित भएमा समाजवादी उम्मेदवारले जितेको सन् १९८८ पछि यो पहिलो घटना हुने वीवीसीले जनाएको छ । पहिलो चरणको निर्वाचनमा सार्कोजी भन्दा अगाडि देखिएका होलिण्डेले अरु उम्मेदवारलाई प्राप्त मत बटुल्ने अपेक्षा गरिएकोले उनको जीत हुने अपेक्षा गरिएको छ ।

 

तर फ्रान्समा आज मतदान सम्पन्न नभएसम्म उम्मेदवारको पक्ष विपक्षमा कुनै संचार माध्यमबाट प्रचारबाजी गर्न प्रतिबन्ध लगाईएको छ । बढ्दो बेरोजगारी र युरोपेली आर्थिक संकट चुनावका मुख्य मुद्धा बनेका छन् ।

 

पहिलो चरणको निर्वाचनमा होलिण्डेले २८ दशमलव ६ र सार्कोजीले २६ दशमलव २ प्रतिशत मत पाउनु भएको थियो । पहिलो चरणमा उममेदवार भएका फार राईटका मेरिन ली पेन र सेन्ट्रा राईटका फ्रान्कोईस बेरुका मतदाताहरुको झुकाव जता जान्छ उसैले विजय हासिल गर्ने बताईएको छ ।

 

ली पेनले भने भने आफुले मत पत्र खाली राख्ने जनाउंदै समर्थकहरुलाई विवेक प्रयोग गर्न अपील गर्नुभएको छ । २२ अप्रिलको पहिलो चरणको निर्वाचनमा ९ प्रतिशत मत ल्याएका बेरुले भने होलिण्डेको पक्षमा मतदान गर्न समर्थकहरुलाई अपील गरेका छन् ।