अखण्ड सुदूरपश्चिमको माग गर्दै २० दिनदेखि भइरहेको आन्दोलनको पक्ष र विपक्षबीच झडप बढ्न थालेपछि जातजातिबीचको सद्भाव खलबलिन नदिन धनगढीमा विभिन्न संस्थाहरुले सद्भाव -याली निकालेका छन् ।

 

लामो आमहड्तालले जनजीवन अस्तव्यस्त भैरहेकै बेला अखण्ड सुदूरपश्चिम पक्षधर र विपक्षबीच हिजो झडप भएपछि आज सद्भाव -याली निकालिएको हो ।

 

यसैबीच दलहरुले ११ प्रदेश बनाउनेसहितका सहमति गरेपछि २० दिनदेखिको आन्दोलन फिर्ता लिने विषयमा आन्दोलनकारीहरु छलफलमा जुटेको खबर छ ।

यसअघि हिजो क्याम्पस चोकमा भएको झडपमा १४ जना घाइते भएका थिए । अखण्ड सुदूरपश्चिमको आमसभामा सहभागी हुन गएकालाई माओवादी र थरुहट पक्षधरले बाटोमा रोक्न खोज्दा झडप भएको थियो । २० दिनदेखिको बन्दले नागरिकको जनजीवन भने अस्तव्यस्त बन्दै गएको छ ।

 

अत्यावश्यक खाद्यान्नदेखि औषधिसमेत सकिएका छन् । औषधिको अभावमै विरामीले ज्यान गुमाउनु परेको छ । पहाडी जिल्लाको जनजीवनमा सबैभन्दा बढी असर परेको छ । RSS