माओवादी रामबहादुर थापाद्धारा जनविरोधी संविधान बनाउन षड्यन्त्र भइरहेको भन्दै जनविद्रोहको लागि तयार हुन आह्वान    
(२०६८ चैत्र २७, शनिवार)
- लवदेव ढुंगाना
पाँचथर - माओवादीका महासचिव रामबहादुर थापाले शान्ति र संविधानको नाममा जनविरोधी संविधान बनाउन षड्यन्त्र भइरहेको भन्दै जनविद्रोहको लागि तयार हुन आह्वान गरेका छन् । पाँचथरको फिदिममा शनिबार राज्य समिति र जिल्लास्तरीय कार्यकर्ता प्रशिक्षणमा बोल्दै थापाले संस्थापन पक्ष जनविरोधी संविधानका लागि लागेको आरोप लगाउँदै 'जनपक्षीय कित्ता' मा उभिन आग्रह गरे ।
नेता थापाले भारतको इसारामा पहिचान र संघीयताविहीन 'जनविरोधी संविधान' ल्याउन लागेको संकेत भन्दै यसो भए 'जनविद्रोह' को विकल्प नहुने बताए । उनले संविधान नल्याई ०४६ सालकै संविधान ब्युँताउने षड्यन्त्र सुरु भएकाले आफूहरूले भनेजस्तो 'जनसंविधान' को सम्भावना न्यून बन्दै गएको हुँदा संघर्ष जारी राख्नु पर्ने बताए ।
थापाले माओवादी नेतृत्वको अहिलेको सरकार भ्रष्टाचार, अपराध, विकृति र महँगी बढाउन बेलगाम ढंगले अघि बढेको बताए । षड्यन्त्र र जालझेलका कारण आगामी जेठ १४ गतेभित्र संविधान नबन्ने भन्दै उनले भने- 'जनताविरोधी दोष र पापबाट मुक्तिका लागि राष्ट्रियता र जनताको पक्षमा जोखिम उठाउनु जरुरी छ ।' | 
