राज्य पुनर्संचना गर्दा गौतम बुद्धको जन्मस्थल लुम्बिनीको नाममा गरिनुपर्ने मागसहित चरणबद्ध आन्दोलनको घोषणा    
(२०६९ वैशाख १३, मंगलवार)
बुटवल । राज्य पुनर्संचना गर्दा लुम्बिनी क्षेत्रलाई अखण्ड राख्दै त्यसको नामाकरण भगवान गौतम बुद्धको जन्मस्थल लुम्बिनीको नाममा गरिनुपर्ने मागसहित चरणबद्ध आन्दोलनको घोषणा गरिएको छ ।
यस क्षेत्रका ३ दर्जन विभिन्न संघसंस्थाहरुको सहभागितामा गठित लुम्बिनी प्रदेशका लागि नागरिक अभियान, लुम्बिनीले चरणवद्ध आनदोलन घोषणा गरेको हो । चरणबद्ध आन्दोलनका क्रममा बैशाख १० गते अर्थात भोलि बिहान जिल्ला प्रशासन कार्यालय, रुपन्देहीमा एक घण्टा धर्ना दिने कार्यक्रम तय गरिएको छ ।
त्यसैगरि लुम्बिनी अञ्चलनका ६ वटै जिल्लामा अन्तरक्रिया, सभासदहरुको भेला, हस्ताक्षर तथा काठमाडौमा प्रदर्शन लगायतका कार्यक्रममा तय गरिएको अभियानका संयोजक डिआर घिमिरेले बताउनुभयो ।
यसैबीच राज्य पुनःसंरचना गर्ने क्रममा ऐतिहासिक, पुरातात्विक तथा सांस्कृतिक सम्पदाको हिसाबले विश्वमा परिचित नेपालको गौरव क्षेत्र लुम्बिनीलाई वेवास्ता गरिएको भन्दै त्यसका विरुद्ध सशक्त आन्दोलन गर्नुपर्ने कुरामा बुटवलमा आयोजित एक कार्यक्रममा जोड दिइएको छ ।
लुम्बिनी प्रदेशका लागि नागरिक अभियान रुपन्देहीले बुटवलमा आयोजनामा गरेको हाम्रो एकीकृत अभियानः लुम्बिनीको सार्थक पहिचान विषयक अन्तरक्रिया कार्यक्रमका सहभागीहरुले नेपाललाई नै विश्वमा चिनाउने लुम्बिनी, सगरमाथालगायतका गौरवहरुलाई ओझेलमा पार्दै संविधानलाई लेनदेनको विषय बनाएको आरोप पनि लगाएका छन् ।
| 
