राष्ट्रपति रामबरण यादवद्धारा देश विखण्डन हुने खालको गंध आएमा त्यो आफ्नो हातबाट जारी नहुने घोषणा           (२०६९ वैशाख ३, शनिवार)

राष्ट्रपति रामबरण यादवले संघीयतामा जांदा, उनकै भनाइमा, देश विखण्डन हुने खालको गंध आएमा त्यो आफ्नो हातबाट जारी नहुने बताएका छन्।

दलहरुले शान्ति प्रक्रियाका मुख्य विषयहरु लगभग टुंग्याई संविधान निर्माण तिर ध्यान केन्द्रित गर्न लागेका बेला राष्ट्रपतिले जथाभावी राज्य पुनर्संरचना नगर्न दलहरुलाई सचेत पनि गराए।

राष्ट्रपति रामबरण यादवले प्राय: नियमित जसो दलका नेताहरुलाई कहिले भेटेर, त कहिले सार्वजनिक रुपमै सचेत गराँउदै आएका थिए।

काभ्रेमा शुक्रबार एक शक्तिपीठको उदघाटन कार्यक्रमा बोल्दै राष्ट्रपति रामबरण यादवले भने, “म तपाइहरुलाई यो विश्वास दिलाउन चाहन्छु कि देशको विखण्डनको केहि मैले गंध पाए भने त्यो मेरो हातले हुंदैन।”

संविधान जारी गर्न राष्ट्रध्यक्षको भूमिका रहने उल्लेख गर्दै राष्ट्रपतिले सबैलाई मिलेर काम गर्न सल्लाह पनि दिए।

उनले जातीय तथा भाषिक अकांक्षालाई सम्बोधन गर्दा देशको एकता र अखण्डता प्रति पनि संवेदनशील हुनु पर्ने तर्फ दलहरुको ध्यान तान्ने प्रयास गरेका थिए।

राष्ट्रपतिले यादवले भने, “संविधान चाहिं राष्ट्राध्यक्ष मार्फत घोषणा हुन्छ।”

राष्ट्रपतिले आम जनतालाई दलहरु माथि दबाब सृजना गर्न पनि आग्रह गरे।

दलहरुसंग आफुले समन्वय गरिरहेको उल्लेख गर्दै उनले देशको हितलाई सर्वपरि राख्नुपर्नेमा जोड दिए।

संविधानको बारेमा संवैधानिक राष्ट्राध्यक्षको शुक्रबारको अभिव्यक्ति शायद अहिलसम्मकै सबैभन्दा कडा थियो।