स्थानीय विकासमन्त्री टोपबहादुर रायमाझीद्धारा मोहन बैद्य समूहले महत्वपूर्ण मन्त्रालय नपाएपछि बाबुराम र प्रचण्डको विरोध गर्न थालेको आरोप           (२०६८ चैत्र २७, शनिवार)

जनआन्दोलन दिवसका अवसरमा एकीकृत नेकपा (माओवादी)को संस्थापन पक्षले आज भैरहवामा आयोजना गरेको कार्यक्रममा बोल्दै रायमाझीले विगतमा सँगै क्रान्ति गरेका आफ्नै साथीहरूलाई राष्ट्रघाती देख्ने वैद्य समूहले हिजोका राजावादी र मण्डले समूहसँग सहकार्य गर्न खोजेको आरोप लगाउनुभयो ।

वैचारिकरुपमा वैद्य समूह जडसूत्रवादी भएको र समय सापेक्षअनुरुप चल्न नसकेको आरोप लगाउँदै मन्त्री रामाझीले संविधानसभाको निर्वाचनपछि सबैभन्दा कम समय सरकारको नेतृत्व सम्हाल्ने मौका आफ्नो पार्टीलाई आए पनि नेपाली काँग्रेस र एमालेको पालामा भन्दा शान्ति र संविधानको कामको तिव्रता आफ्नै पार्टीको सरकारको पालामा भएको दाबी गर्नुभयो ।

कार्यक्रमा एनेकपा (माओवादी)का केन्द्रीय सदस्य भक्ति पाण्डे, रुपन्देही जिल्ला ईन्चार्ज हकीकुल्लाह खाँ, केन्द्रीय सल्लाहकारद्वय रामचन्द्र भट्टराई र विनोद उपाध्याय, जिल्ला सहईन्चार्ज माधव शर्मा लगायतले बोल्नुभएको थियो ।