अमेरीकामा हुने अति विकसित राष्ट्रहरुको संगठन जी एटको सम्मेलनमा रुसी राष्ट्रपतिले भाग नलिने           (२०६९ वैशाख २९, विहीवार)

अमेरीकामा हुने अति विकसित राष्ट्रहरुको संगठन जी एटको सम्मेलनमा रुसी राष्ट्रपति भाग नलिने हुनु भएको छ । यही मे १८ र १९ तारिखमा अमेरिकाको क्याम्प डेभिडमा हुने सम्मेलनमा सहभागी हुन नसक्ने जानकारी पुटिनले अमेरिकी राष्ट्रपति बाराक ओवामालाई गराएका छन् । केही दिनअघि रुसी राष्ट्रपतिको तेस्रो कार्यकालका लागि शपथ लिएका पुटिनले नयाँ मन्त्रीपरिषद गठनमा आफु व्यस्त हुनु परेको कारण देखाउँदै सम्मेलनमा निवर्तमान राष्ट्रपति दिमित्री मेदभेदेवलाई पठाउने बताएका छन् ।

विश्व बजारमा हस्तक्षेपकारी भूमिका खेल्नसक्ने जी एट सम्मेलनमा पुटीनको अनुपस्थितीलाई रुस र अमेरीकाबीचको सम्बन्ध चिसिएको सूचकको रुपमा लिनुपर्ने विश्लेषण गरिएको छ ।

रुसमा केही महिना अघि सम्पन्न राष्ट्रपतिको चुनावमा धाँधली भएको भन्दै प्रदर्शन भईरहँदा अमेरीकाले प्रदर्शनकारीलाई भड्काएको आरोप रुसी अधिकारीहरको छ । पुटिनले राष्ट्रपतिको शपथ लिंदा पनि क्रेमलिन बाहिर हजारौं प्रदर्शनकारीले विरोध गरेका थिए भने अमेरिकी विदेश मन्त्रालयले क्रेमलिने प्रदर्शनकारीमाथि दमन गरेको जिकीर गरेको थियो ।