काठमाडौं - प्रधानमन्त्री बाबुराम भट्टराईले बन्द फिर्ताको घोषणा नगरे जनमुक्ति पार्टीका तर्फबाट मन्त्री बनेका श्रममन्त्री मालबरसिंह थापालाई बर्खास्थ गर्ने गर्ने चेतावनी दिएको २४ घण्टा नबित्दै नेपाल बन्द फिर्ता भएको छ। प्रधानमन्त्रीको चेतावनीपछि मोर्चाका प्रतिनिधि र सरकारबीच भएको वार्ता 'सकारात्मक' भएकाले बन्द फिर्ता गरिएको जनाइएको छ।

मोर्चाले आह्वान गरेको बन्दको मुलुकभरि अवज्ञा भएको थियो।

प्रधानमन्त्रीको चेतावनीपछि मन्त्री तथा पार्टी अध्यक्ष थापाले शनिबारै राजधानीमा उपलब्ध केन्द्रीय सदस्यहरूको अनौपचारिक छलफल गरेका थिए। 'प्रधानमन्त्रीले मलाई बन्द फिर्ता नलिए मन्त्रीबाट निकाल्छु भन्नुभयो,' उनले राति नागरिकसँग भने, 'पार्टीलाई मनाउन पहल गर्छु भन्ने आश्वासन दिएको छु।'
बन्द फिर्ताको निर्णय नभए 'मन्त्री निवास छाडेर आफ्नो घरतिर लाग्छु' भन्ने आश्वासन पनि उनले प्रधानमन्त्रीलाई दिएको जानकारी दिए।

प्रधानमन्त्रीको निजी सचिवालयका अनुसार, प्रधानमन्त्रीले मन्त्री थापालाई मन्त्रिपरिषद्मा बसेको कुनै पनि पार्टीले बन्द आह्वान गर्न नमिल्ने सम्झाएका थिए। पार्टीका जायज मागप्रति सकारात्मक रहेकोमा पनि प्रधानमन्त्रीले जनाएका थिए। जनमुक्ति पार्टीका थापा एक्लो सभासद् हुन्। सद्भावना (आनन्दीदेवी) कि सरिता गिरीलाई बर्खास्त गरेपछि गत महिना प्रधानमन्त्रीले थापालाई मन्त्रीमा नियुक्त गरेका थिए।  - नागरिक