अखण्ड सुदूरपश्चिम नागरिक आन्दोलन समिति र सरकारबीचको वार्ता निष्कर्षविहीन           (२०६९ वैशाख ३१, शनिवार)

काठमाडौं  - अखण्ड सुदूरपश्चिम नागरिक आन्दोलन समिति र सरकारबीचको वार्ता शनिबार निष्कर्षविहीन सकिएको छ ।

शान्ति मन्त्रालयमा सरकारी वार्ता टोलीसँग भएको वार्ता विषय प्रवेश नभई स्थगित भएको वार्ता टोली सदस्य नैनसिंह महरले जानकारी दिए । ‘आजको वार्तामा दुवैपक्षबीच कुरा सुन्ने काममात्र भयो,’ उनले भने ।

सरकारी वार्ता टोलीले अखण्ड सुदूरपश्चिमका आन्दोलनको मागबारे शीर्ष नेताहरुसँग छलफल गर्ने बताएपछि अगाडि बढ्न नसकेको उनले बताए । आन्दोलनकारीले आफ्ना मागबारेको ज्ञापन पत्र सरकारी वार्ता टोलीलाई बुझाएका छन् ।

वार्ताका लागि नागरिक आन्दोलन समिति धनगढीका सह–संयोजक हेमन्त रेग्मीसहितको ३६ सदस्यीय वार्ता टोली काठमाडौं आएको छ । उपप्रधानमन्त्री कृष्णप्रसाद सिटौला संयोजकत्वको सरकारी वार्ता टोलीमा बिना विभागीय मन्त्री वर्षमान पुन र सिँचाइ मन्त्री महेन्द्र यादव सदस्य छन् ।

शीर्ष नेताहरुसँगको छलफलपछि पुनः आइतबार छलफल हुनेछ । समय भने तय भएको छैन ।

अखण्ड सुदूरपश्चिमको माग गर्दै १६ दिनदेखिको आन्दोलन जारी रहँदा जनजीवन कष्टकर बन्दै गए पनि सुदूरपश्चिमेलीले आन्दोलन छाडेका छैनन् । - कान्तिपुर