उप-राष्ट्रपति परमानन्द झाले दिगो शान्ति कायम गर्न र संविधान लेखनका लागि एमाले र कांग्रेस असफल भइसकेको बताएका छन्। अघिल्ला सरकारमा सहभागी एमाले र कांग्रेसले दिगो शान्ति र संविधान लेखनका विषयमा कुनै रचनात्मक काम गर्न नसकेको भन्दै उनले एमाले र कांग्रेस असफल दलको रुपमा रहेको बताए।  

अन्तिम विकल्पको रुपमा पछिल्लो पटक माओवादी र मधेशवादी दल गठबन्धन सरकारको काम हेर्न बाँकी रहेको उनले बताए। 

पोखरामा मंगलबारदेखि सुरु हुने एक कार्यक्रममा सहभागी हुन सोमबार यहाँ आएका उप-राष्ट्रपति झाले मधेशवादी र माओवादीले विगतका सरकारले गर्न नसकेका काम गरेर देखाउनुपर्ने बताए। 

‘प्रधानमन्त्री बाबुराम भट्टराईको सपथग्रहण हुने दिन मैलै प्रधानमन्त्रीलाई नै भेटेर अन्तिम विकल्पको रुपमा रहेको बताएको छु,' उनले संवाददाताहरुसँग भने, ‘अहिलेको सरकारको विकल्प पनि छैन, यसले काम गर्न नसके कसैले गर्दैन।' उनले काम गर्न नसक्ने कुनैपनि दललाई सफल मान्न नसकिने बताए। 

शान्ति र संविधानका लागि तीन वर्षसम्मको अवधिमा कुनै काम हुन नसकेको भन्दै देशको ठेकेदारी एमाले र कांग्रेसको मात्र नरहेको बताए। ‘देशको ठेक्का एमाले र कांग्रेसको मात्र होइन, अरु दलको पनि हिस्सा छ,' झाले भने, ‘नेपाली जनताले चाहेबमोजिम यी दलले काम गर्न सकेनन्, अहिलेको गठबन्धन अन्तिम हो।' ठूला दललाई ठूलो दलको रुपमा मात्र रटेर नहुने उनले बताए।