कीर्तिपुर । त्रिभुवन विश्वविद्यालयको ३६ औँ दीक्षान्तमा पाँच हजार ५६७ विद्यार्थी सहभागी हुने भएका छन् । दीक्षान्त समारोह यही मङ्सिर ७ गते त्रिविवि कीर्तिपुरको दीक्षान्त मण्डपमा हुनेछ ।
त्रिभुवन विश्वविद्यालयबाट स्नातक, स्नातकोत्तर, एमफिल तथा विद्यावारिधि तह उत्तीर्ण गरेका विद्यार्थी सहभागी हुने उक्त समारोहसम्बन्धी तयारी पूरा भएको त्रिवि परीक्षा नियन्त्रण कार्यालयले जनाएको छ ।
त्रिवि परीक्षा नियन्त्रण कार्यालयको पूर्व सूचनाअनुसार गत असोज ७ गतेभित्र नियमानुसार दीक्षान्त फाराम भरेका विभिन्न तहका विद्यार्थीलाई सहभागी गराइने सहपरीक्षा नियन्त्रक कृष्णप्रसाद आचार्यले जानकारी दिनुभयो ।
दीक्षान्त समारोह युनिभर्सिटी अफ कोलम्बोका उपकुलपतिको प्रमुख आतिथ्यमा हुने उहाँले बताउनुभयो ।
दीक्षान्त समारोहमा सहभागी हुन लगाइने दीक्षान्त पोशाक लिन बिहीबार बिहानैदेखि परीक्षा नियन्त्रण कार्यालयमा विद्यार्थीको भिड लागेको थियो ।
मंसिर ३ गते, २०६७ मा प्रकाशित
