काठमाडौं – काठमाडौंको भाटभटेनीस्थित एक जुवाघरबाट १३ जुवाडे रंगेहात समातिएका छन्। महानगरीय प्रहरी परिसरको टोलीले शुक्रबार मध्याह्न छापा मारेर २ लाख २५ हजार नगदसहित जुवा खेलिरहेका उनीहरूलाई नियन्त्रणमा लिएको हो।
प्रहरीका अनुसार लामो समयदेखि उक्त घरमा अवैध जुवा खेलाइने गरेको सूचनाका आधारमा परिसरको विशेष टोलीले घर घेरा हाली छापा मारेको हो। दोस्रो तलामा जुवा खेलिरहेकाहरूका साथबाट प्रहरीले २ लाख २५ हजार रुपैयाँ र एक सय ८० अमेरिकी डलर बरामद गरेको थियो। पक्राउ पर्नेहरू व्यापारी, वैदेशिक रोजगार व्यवसायी, जग्गा कारोबारी र अवकासप्राप्त प्रहरी रहेको परिसर अधिकारीले जनाए।
बैशाख २५ गते, २०६८ मा प्रकाशित
