नेपालको जनसंख्या आगामी एकतीस वर्षमा दोब्बर हुने अनुमान

काठमाडौं  – नेपालको जनसंख्या आगामी एकतीस वर्षमा दोब्बर हुने अनुमान
गरिएको छ । २०५८ को जनगणनाले जनसंख्या वाषिर्क दुई दशमलव २५ प्रतिशतले वृद्धि
भइरहेको देखाएकाले यही दर कायम रहे एकतीस वर्षमा दोब्बर हुने अनुमान गरिएको हो ।

जनसंख्याका चुनौतीलाई सम्बोधन गर्ने, जनसंख्याका मुद्दालाई विकासका हरेक
क्षेत्रमा एकीकृत गर्दै लैजाने एवं जनसंख्या व्यवस्थापन र परिचालनलाई सहज र
समयअनुकूल बनाउने उद्देश्यले २० वर्षे ‘जनसंख्यासम्बन्धी दीर्घकालीन योजना
(२०६७-२०८७)’ सोमबार सार्वजनिक भएको छ ।

विश्व जनसंख्या दिवसका अवसरमा स्वास्थ्य तथा जनसंख्या मन्त्रालयको कार्यक्रममा
सार्वजनिक गरिएको योजनाले गरिब तथा जोखिमपूर्ण अवस्थामा रहेका समूहमा प्रभावकारी
स्वास्थ्य सेवाको विस्तार गर्ने, प्रजनन स्वास्थ्य सेवाको विस्तार गर्ने र
देशव्यापी रूपमा गुणस्तरीय स्वास्थ्य सेवाको विस्तार गर्ने उद्देश्य लिएको छ ।

प्रधानमन्त्री तथा राष्ट्रिय जनसंख्या समितिका अध्यक्ष झलनाथ खनालले उक्त योजना
विमोचन गर्दै खनालले नेपालमा घट्दो मृत्युदर, घट्दो तर उच्च प्रजनन दर र घट्दो तर
उच्च मातृ तथा शिशु मृत्युदर सुखद लक्षण भएको समेत जनाए ।