इनरुवामा २४ घन्टामा दुई पटक विवाह

– अबधेशकुमार झा, ईकान्तिपुर

इनरुवा  – सामाजिक रीतिअनुसार बिहेपछि भोजभतेर हुन्छ, अनि
बेहुला-बेहुली बिदा गरिन्छ । तर यहाँको एउटा विवाहमा चेली बिदा गरी पठाएको चार
घन्टापछि नै माइती पक्षले फर्काएर ल्याएका छन् । अनि लगत्तै भोलिपल्ट केटाले अर्की
केटीसँग बिहे गरेका छन् । सुनसरीका जिल्ला शिक्षा अधिकारी हरिप्रसाद वस्तीका छोरा
मनोहर र इनरुवा, बलाहा बस्ने मित्रलाल पोखरलेकी छोरी उमाको शुक्रबार इनरुवास्थित
सत्यनारायण मन्दिरमा बिहे भएको चार घन्टामै माइतीले उमालाई फर्काएका हुन् ।

दिउँसो बिहे गरी छोरीको बिदाइ गरेकाहरूले साँझ विराटनगर ५ स्थित वस्तीको घरमा
गएर छोरी फर्काई लगेको बेहुलाका बुवा जिशिअ वस्तीले बताए । साँझ ५ बजे बिहे सम्पन्न
भई बिदाइ भइसकेपछि राति १० बजे बलाहाबाट गएका माइतीले छोरी लगेको वस्तीले बताए ।

बेहुला मनोहर लागूऔषधको दुव्र्यसनी रहेको भन्दै छोरी फर्काएको माइती पक्षले
बताएका छन् । उनीहरूका अनुसार मनोहर लागूऔषध दुव्र्यसनी रहेको र छोरीले दुःख पाउने
अवस्था देखेर फर्काइएको हो ।

बेहुली पक्षले दुव्र्यसनीलाई छोरी दिएर भविष्य बिगार्नुभन्दा अर्कोसित बिहे
गर्ने सोचका साथ छोरी फर्काएको जनाएका छन् । जिशिअ वस्तीले भने आफ्नो छोरा
दुव्र्यसनी नरहेको दाबी गरेका छन् । उनले भने, ‘ऊ दुव्र्यसनी होइन, कसैले भन्छ भने
प्रमाणित गरेर देखाउनुपर्छ ।’ उनले बुहारी फर्काएर नलग्न पटकपटक आग्रह गर्दा पनि
उनका अभिभावकले लगेकोमा आफूलाई पनि दुःख लागेको उनले बताए ।

यसैबीच जिशिअ वस्तीका छोरा मनोहरले शनिबार अर्को बिहे गरेका छन् । ‘छोरालाई
अनावश्यक आरोप लगाएर बुहारी फर्काएर लगेपछि शनिबार हामीले अर्की बुहारी भित्र्याएका
छौं,’ वस्तीले भने । तर छोरा मनोहरले अर्को बिहे कहाँ र कोसित गरेको भन्नेचाहिँ
वस्तीले बताएनन् ।