संयुक्त राष्ट्रसंघका महासचिव बान कि मुनले लिवियामा जारी संघर्ष अन्त्य गरी कानुन व्यवस्था लागु गर्न अन्तर्राष्ट्रिय समुदायलाई आग्रह गर्नुभएको छ ।
न्यूयोर्कमा बोल्दै महासचिव बानले लिवियाको संघर्ष नयाँ र निर्णायक चरणमा प्रवेश गरेको भन्दै सत्ता हस्तारण सहज बनाउन एक जुट हुनुपर्नेमा जोड दिनुभयो । उहाँले लिवियाको राष्ट्रिय संक्रमणकालीन परिषद् र अफ्रिकी युनियनबीच राम्रो सम्बन्धका लागि पनि आग्रह गर्नु भयो । युनियनले लिवियाको सक्रमणकालीन परिषद्लाई पश्चिमा मुलुकले जसरी मान्यता दिइसकेको छैन ।
यसैबीच, गत आइतवार यता ट्रिपोली प्रवेश गरेका विद्रोहीले ट्रिपोलीको अधिकांश भाग आफ्नो नियन्त्रणमा आएको र संघर्ष कर्णेल गद्धाफीको गृहनगर तर्फ केन्द्रीत रहेको बताएका छन् । अन्तर्राष्ट्रिय सञ्चारमाध्यमले भने ट्रिपोलीको अन्तर्राष्ट्रिय विमानस्थल आसपास गद्धाफीका समर्थकहरुसंग विद्रोहीको संघर्ष जारी रहेको जनाएका छन् । ट्रिपोलीमा विद्रोहीले शहर कब्जा गरेपछि पहिलो पटक शान्तसँग शुक्रवारे प्रार्थना सम्पन्न भएको छ । शहरमा विद्युत , खानेपानी सेवा अवरुद्ध भए पनि केही पसल भने खुल्न थालेका छन् ।
यसैबीच ट्रिपोलीको अबु सलीम क्षेत्रको एक अस्पतालमा करिब २ सय भन्दा बढी क्षतविक्षत शव फेला परेका छन् । सो क्षेत्रमा केही दिन अघि विद्रोही र गद्धाफीका समर्थकबीच भीषण संघर्ष भएको थियो । आफ्नो निवासबाट खेदिएका गद्धाफी कहां छन् भन्ने बारे भने केही खुल्न सकेको छैन ।
भाद्र १० गते, २०६८ मा प्रकाशित
