लिवियामा विद्रोहीको राष्ट्रिय संक्रमणकालीन परिषद् एनटीसीका प्रमुख मुस्ताफा अब्दुल जलीलले कर्णेल गद्धाफीको नियन्त्रणमा रहेको भूभाग नियन्यन्त्रणमा लिन हतियार आवश्यक भएको बताएका छन् । राजधानी ट्रिपोलीमा बीबीसीसँगको कुराकानीमा जलीलले हतियारको आह्वान गर्दै लुक्दै बसेका गद्धाफी दक्षिणी लिवियामा रहेको र आक्रमणको योजना बनाइरहेको बताए ।
गद्धाफीका धेरै समर्थक दक्षिणी मरुभूमि सबातर्फ भागेको र त्यस क्षेत्र नियन्त्रणमा लिन थप हतियार आवश्यक भएको उनको भनाइ थियो । जलीलले गद्धाफी समर्थकको कब्जामा रहेको भूभाग नियन्त्रणमा नल्याइकन आफ्नो पूरै प्रशासन ट्रिपोलीमा स्थानान्तरण नगरिने स्पष्ट पारे । एनटीसीका अधिकारीहरुले गद्धाफीका नजिकका नेताहरुले सुन र नगद लिएर छिमेकी मुलुक नाइजर भागिरहेको बताएका छन् ।
यता गद्धाफीले संयुक्त राष्ट्रसघलाई आफ्नो जन्मथलो सिर्तमा भैरहेको अपराध रोक्न आह्वान गरेका छन् गद्धाफीले लिवियाबाट भाग्नुभन्दा मर्न तयार रहेको बताउदै आएका छन् ।
भाद्र २९ गते, २०६८ मा प्रकाशित
