बहराइनमा सरकार विरोधी प्रदर्शनकारीलाई उपचार गरेको अभियोगमा २० जना चिकित्सकलाई १५ वर्ष सम्मको जेल सजाय

राजतन्त्रात्मक खाडी मुलुक बहराइनमा सरकार विरोधी प्रदर्शनकारीलाई उपचार गरेको अभियोगमा २० जना चिकित्सकलाई १५ वर्ष सम्मको जेल सजाय सुनाइएको छ । शिया समुदायको अधिकारको माग गर्दै भएको प्रदर्शनमा घाइते भएकाहरुलाई ती चिकित्सकहरुले उपचार गरेका थिए । उनीहरुले सुरक्षाकर्मीको भने उपचार नगरेको आरोप लगाइएको छ । यस्तै अदालतले प्रहरीलाई मारेको अभियोगमा एक जना प्रदर्शनकारीलाई मृत्युदण्डको सजाय सुनाएको छ ।

यसअघि पनि सैन्य अदालतले प्रहरी अधिकारीलाई मारेको अभियोगमा दुई जना प्रदर्शनकारीलाई मृत्यदण्डको सजाय सुनाएको थियो भने आठ जना शिया कार्यकर्तालाई जन्म कैदको सजाय सुनाएको थियो । मानव अधिकारकर्मीहरुले अदालतको फैसला आश्चर्यजनक भएको भन्दै चिकित्सकहरुले आफ्नो धर्म निर्वाह गरेको बताएका छन् । बहराइनमा सुन्नी समुदायका राजामा शासनमा रहेका छन् ।