अफगानिस्तानको राजधानी काबुलमा सम्पन्न जातीय नेताहरुको लोया जिर्गा सम्मेलनले तालिवानसँग सरकारले अघि वढाएको शान्ति वार्तालाई समर्थन गरेको छ । सम्मेलनले नेटोका अरु सेना स्वदेश फर्किए पनि अमेरिकी सेना अफगानिस्तानमा रहन सक्ने प्रस्तावलाई स्वीकृती प्रदान गरेको छ ।
प्रस्तावित सुरक्षा सम्झौता अनुसार सन् २०१४ पछि पनि अमेरिकी सेना अफगानिस्तानमा रहन सक्ने छ । तर दश वर्षका लागि प्रस्तावित सम्झौतामा अमेरिकी सेनाले रात्री कारवाही गर्न नपाउने लगायतका विभिन्न शर्त राखिएका छन् । यो प्रस्ताव वाध्यकारी भने हुने छैन ।
चार दिन सम्म चलेको सम्मेलनमा करिब २ हजार आदीवासी र जातिय नेताहरुको सहभागिता थियो । उच्च सुरक्षा सतर्ककताकाबीच सम्पन्न सम्मेलनमा भाग लिने जो कोही माथि तालिवानले आक्रमण गर्ने धम्की दिएको थियो । गत सेप्टेम्बरमा कारजाईका शान्तिदूत पूर्व अफगान राष्ट्रपती बुरानुद्धिन रब्बानीको हत्या पछि तालिवान विद्रोहीसंगको शान्ति वार्तालाई प्राथमिकता दिंदै लोया जिर्गाको आयोजना गरिएको हो ।
मंसिर ५ गते, २०६८ मा प्रकाशित
