भारत उत्तर प्रदेश राज्यमा तल्लो जातको बच्चाको नाम माथिल्लो जातको बच्चाको जस्तो राखेको भन्दै दलित बच्चाको हत्या

भारत उत्तर प्रदेश राज्यको राधौपुर गाउँमा तल्लो जातको बच्चाको नाम माथिल्लो जातको बच्चाको जस्तो राखेको भन्दै एक दलित बच्चाको हत्या गरिएको छ । प्रहरीका अनुसार मारिएका १४ वर्षिय निरजकुमारका बुबा राम सुमेरलाई उनका दुई छोराको नाम बदल्न गाउँका माथिल्लो जातका जवाहार चौधरीले बारम्बार धम्की दिएका थिए । जवाहार चौधरी र राम सुमेर दुवैको छोराको नाम निरज र धीरज थियो । तर सुमेरले चौधरीको धम्कीको बेवास्ता गर्दै आएका थिए ।

मृतक निरजको शव घाँटी रेटिएको अवस्थामा गाउँकै खेतमा फेला परेको थियो । प्रहरीले घटनामा संलग्न भएको आरोपमा जवाहर चौधरीको परिवारका दुई जनालाई पक्रेको छ । प्रहरीले चौधरी र राम सुमेरको परिवारबीच छोराहरुको नामको विषयमा लामो समयदेखि विवाद चल्दै आएको जनाएको छ । चौधरीले भने हत्यामा आफ्नो परिवारको कुनै संलग्नता नरहेको दाबी गरेका छन् । भारतमा जातीय आधारमा विभेद गर्नु कानुनी रुपमा दण्डनीय मानिए पनि व्यवहारमा जातीय विभेद कायमै छ ।