उत्तर कोरियाली दिबंगत नेता किम जोङ ईलका कान्छा छोरा किम जोङ उन सेनाको सर्वोच्च कमान्डर नियुक्त

उत्तर कोरियाली दिबंगत नेता किम जोङ ईलका कान्छा छोरा किम जोङ उन सेनाको सर्वोच्च कमान्डर नियुक्त भएको सरकारी सञ्चारमाध्यमहरुले जनाएका छन् ।

 

सत्तारुढ दलको रोदोङ सिनमुन पत्रिकाले किम जोङ उनलाई अनन्त विजयका लागि उत्तर कोरियाको नेतृत्व गर्न आग्रह गरेको जनाएको छ । किम जोङ इलको यसै साता ६९ वर्षको उमेरमा निधनपछि उन महान उत्तराधिकारी भएको सरकारी सञ्चारमाध्यमले यसअघि नै जनाएका थिए ।

 

किम जोङ उनमा राजनीतिक अनुभव कम भएपनि वरिष्ठ अधिकारीहरुले उनलाई बाटो देखाउने विज्ञको अनुमान छ । स्वीट्जरल्याण्डमा अध्ययन गरेका किम जोङ उनलाई गत वर्ष सेनाको चारतारे जर्नेल बनाइएको थियो भने सरकार र सत्तारुढ वकर्स पार्टीको उच्च पद दिइएको थियो ।

 

दिबंगत नेता किम जोङ इल सन् १९९१ मा सर्वोच्च सैन्य कमान्डर बनेको २० औं बार्षिकीको अवसरमा किम जोङ उनलाई सेनाको सवोच्च कमाण्डर घोषणा गरिएको हो ।