म्यानमारकी प्रजातन्त्रवादी नेतृ आङ सानसुकीले संसदको आगामी उपचुनावका लागि हिजो उम्मेदवारी दर्ता गरेकी छन् । नेसनल लिग फर डेमोक्रेसी, एनएलडी पार्टी प्रमुख सुकीले अप्रिल १ मा हुने चुनावमा दक्षिण पश्चिम यंगुनको कावमुबाट चुनाव लड्दै छिन् ।
नोभेम्बर २०१० मा उनी नजरबन्द मुक्त भएकी थिइन् । रिहाइ हुनुभन्दा एक साताअघि भएको आमचुनाव उनको पार्टीले बहिस्कार गरेको थियो । सुधार प्रक्रिया सुरु भएपछि उनको पार्टी राजनीतिक प्रक्रियामा फेरि सामेल भएको हो । विजयी सांसदहरु मन्त्री बनेपछि रिक्त ४८ स्थानमा चुनाव हुन लागेको हो । सुकीको पार्टी एनएलडीले ४० स्थानका लागि प्रतिस्पर्धा गर्दैछ । सैन्य समर्थक सरकारको सुधारका कार्यक्रमको मुख्य परीक्षण यो उपचुनावले गर्ने बताइएको छ । उमेदवारी दर्तापछि उनले सार्वजनिक प्रतिक्रिया दिएकी छैनन् ।
सन् १९९० मा एनएलडीले भारी बहुमतले चुनाव जितेलगत्तै सैन्य शासकले उनलाई नजरबन्दमा राखेको थियो । भने उनको पार्टीलाई सरकार गठन गर्न दिइएन । २०१० को चुनावपछि सैन्य समर्थक पार्टीका थेन सेन राष्ट्रपति भएका छन् । नयाँ सरकारले सुकीसँग वार्ता गरिरहेको छ ।
एनएलडीलाई २०१० को चुनाव बहिस्कार गर्न बाध्य पार्ने निर्वाचन कानुन थेनको सरकारले परिवर्तन गरेको छ ।
माघ ५ गते, २०६८ मा प्रकाशित
