भारतको सेन्ट्रल ब्यूरो अफ ईन्भिेष्टीगेशन सीबीआईले केही भारतीयले कर छल्नका लागि खरबौं रकम विदेशी बैकमा जम्मा गरेको खुलासा गरेको छ ।
गैरकानुनी ढंगबाट विदेशी बैंकमा जम्मा गरिएको यस्तो रकम साँढे २४ लाख करोड रुपैयाँ रहेको उसले जनाएको छ । सीबीआईका निर्देशक अमरप्रताप सिंहले विदेशी बैकमा अवैध रुपले यसरी पैसा जम्मा गर्नेमा सबैभन्न्द बढी भारतीय नै रहेको जनाएका छन् ।
यस्ता अवैध रकम मोरिसस्, स्वीजरल्याण्ड र बृटिश आइल्याण्डस्थित बैकहरुमा जम्मा गरिएको सिंहले जनाएका छन् । सिंहलाई उधृत गर्दै समाचार संस्था पीटीआईले विदेशी बैकमा रहेको ५ सय बिलियन डलर रकम मध्ये सबैभन्दा बढी हिस्सा स्वीस बैकमा रहेको जनाएको छ ।
स्वीस बैकमा कर छलेर पैसा थुपार्नेमा पनि भारतीयहरु नै बढी रहेको दावी सीबीआईको छ । दुई वर्ष अगाडि अमेरिकी ग्लोबल फाइनान्सियल इन्टीग्रीटी नामक संस्थाले पनि सन् १९४८ देखि २००८ सम्ममा भारतबाट ४ सय ६० अरब डलर बाहिरिएको जनाएको थियो ।
सन् १९९१ मा आर्थिक सुधार योजना सुरु गरिएपछि यसरी गैरकानुनी बाटोबाट पैसा बाहिरिन थालेको जनाइएको छ । भारतमा विदेशमा थुपारिएको कालो धन देशमा भित्र्याउन समाजसेवी अन्ना हजारेदेखि स्वामी रामदेवसम्मले अभियान नै छेडेका छन् ।
फाल्गुन २ गते, २०६८ मा प्रकाशित
