अफगानिस्तानमा नेटो गठबन्धन सेनाका प्रमुख जनरल जोन एलेनले अमेरिकी सैन्य शिविरमा कुरान जलाईको घटना पछि भड्किएको हिंसाले नेटो मिशनमा धक्का लागेको बताउनु भएको छ ।
बीबीसीसंगको कुराकानीका क्रममा जनरल एलेनले घटनाबाट नेटो मिशन चांडै सामान्य बन्ने विश्वास व्यक्त गर्नु भयो । उहांले अफगान सुरक्षाकर्मीसंग नेटोको समन्वय भने रहिरहने बताउनु भयो । गत हप्ता अफगानिस्तानको आन्तरिक मामिला मन्त्रालयमै नेटोका दुई उच्च अमेरिकी सैन्य अधिकारी मारिएका थिए ।
आक्रमणकारीले राजधानी काबुलको अत्यन्तै सुरक्षित मानिएको उक्त मन्त्रालय भित्रै पसेर गोली हानेका थिए । घटना लगत्तै नेटोले आफ्ना सबै कर्मचारी फिर्ता बोलाएको थियो ।
अमेरिकी सेनाले मुसलमानको पवित्र ग्रन्थ कुरान जलाएकोमा विरोध भैरहेका बेला यो आक्रमण भएको हो । यता अमेरिकी राष्ट्रपति बाराक ओबामा भने यो घटना पछि पनि अमेरिकाले तय गरेको समयतालिका अनुसार नै अफगानिस्तानबाट अमेरिकी सेना स्वदेश फर्कनेमा विश्वस्त रहेको बताइएको छ ।
फाल्गुन १८ गते, २०६८ मा प्रकाशित
