सिरियामा तेल तथा खनिज उपमन्त्री अब्दो हुसामेद्दीनले पदबाट राजीनामा दिई सरकार विरोधी प्रदर्शनकारीको समुहमा मिस्सिएको घोषणा गरेका छन् । ५८ वर्षिय हुसामेद्दीनले यु ट्युवमार्फत विद्रोहको घोषणा गर्दै बाथ पार्टी पनि छोडेको जनाएका छन् ।
सिरियामा राष्ट्रपति बशार अल असादको शासन विरुद्ध एक वर्ष यता भैरहेको प्रदर्शनमा उनको साथ छोड्ने हुसामेद्दीन अहिलेसम्मकै उच्च तहका नेता हुन् । विद्रोहीहरुले उनको राजीनामाको व्यवस्था मिलाएको बताइएको छ । सिरिया सरकारले भने हुसामेद्दीनको राजीनामाको विषयमा कुनै प्रतिक्रिया जनाएको छैन ।
सिरियामा प्रदर्शनकारीको केन्द्र बन्दै आएको होम्स् शहरमा राष्ट्रसंघको मानवीय सहायता प्रमुख भालेरी आमोसले भ्रमण गरी शहर ध्वस्त भएको जनाए लगत्तै हुसामेद्दीनले विद्रोहको घोषणा गरेका हुन् । आमोसले सेनाको बमबारीका कारण बाबा अमर जिल्ला ध्वस्त हुंदा पूरै बन्द भए जस्तो देखिएको बताएका छन् ।
सिरियाली सेनाले गत हप्ता मात्र यो जिल्ला आफ्नो नियन्त्रणमा लिएको थियो । अधिकारकर्मीहरुले सेना शहरमा प्रवेश गरेपछि नरसंहार मच्चाएको दाबी गरेका छन् ।
फाल्गुन २५ गते, २०६८ मा प्रकाशित
