अफगानिस्तानमा एक अमेरिकी सैनिकले १६ सर्वसाधारणको हत्या गरेपछि अमेरिका विरोधी प्रदर्शन चर्किरहेकै बेला अमेरिकाले सैन्य मिसन चाडै अन्त्य नहुने स्पष्ट पारेको छ ।
अमेरिकी राष्ट्रपति बाराक ओबामाले अफगानिस्तानमा विकसित पछिल्लो घटनाले अन्तर्राष्ट्रिय सेना फिर्ता गर्न हतार नगरिने प्रष्ट्याउनुभएको हो । ओबामाले विदेशी सेना जिम्मेवारी पूरा गरी अफगानिस्तानबाट फर्कने स्पष्ट पार्नुभयो ।
एक अमेरिकी टेलिभिजनसँग ओबामाले अफगान सेनालाई मुलुकको सुरक्षा र अलकायदाको सामना गर्न सक्षम नपारेसम्म अन्तर्राष्ट्रिय सेना नहट्ने बताउनु भयो ।
गत आइतवार कान्दाहारमा एक सन्काहा अमेरिकी सैनिकले १६ सर्वसाधारणको हत्या गरेपछि अमेरिकी र अफगान सेनाबीच सम्बन्ध अत्यन्त तनावपूर्ण बनेको छ । अमेरिकी रक्षामन्त्री लियोन पेनेटाले घटनामा संलग्नविरुद्ध आरोप प्रमाणित भए मृत्युदण्डको सजायँ हुने प्रष्ट गर्नुभएको छ ।
चैत्र १ गते, २०६८ मा प्रकाशित
