एसएलसी परीक्षा आजदेखि शुरु, तराईका जिल्लाहरुमा ब्यापक अनियमितता

 

 

एसएलसी परीक्षा आजदेखि शुरु भएको छ । परीक्षामा ५ लाख २८ हजार २ सय ५७ परीक्षार्थी सहभागी भएका छन् । एसएलसीका लागि देशभर १ हजार सात सय ४८ परीक्षा केन्द्र कायम गरिएको छ ।

 

चितवन र नवलपरासीमा माओवादी जनसेनाका सात सय लडाकुले पनि परीक्षा दिएका छन् । युद्धकालमा बर्जुवा शिक्षा बहिष्कार गर्ने नाममा विद्यालयको पढाई छाडेका उनीहरु अहिले शिक्षाको महत्व थाहा पाएपछि एसएलसी परीक्षामा सामेल भएका हुन् ।

 

नेपाली सेनामा समायोजन रोजेका लडाकुहरुले जागिर खान र माथिल्लो पदमा पुग्न शिक्षा पनि महत्वपूर्ण आधार भएको बताएका छन् ।

पहिलो दिन अंग्रेजी विषयको परीक्षाको क्रममा आज विभिन्न ठाउंमा अनियमितताहरु भएका खवर प्राप्त भएका छन् ।

 

 सरकारले परीक्षामा अमर्यादित गतिविधि गर्ने कर्मचारी, चीट चार्ने विद्यार्थी र चोराउने अभिभावकलाई एक लाख रुपैया जरिवाना र ६ महिनासम्म कैद हुने ब्यवस्था गरेको भए पनि अनियमितता रोकिएको छैन् ।

 

रुकुममा दुई छात्रा परीक्षा हलमै सुत्केरी

दुर्गालाल केसी

दाङ-रुकुममा एसएलसी परीक्षा दिइरहेका दुई परीक्षार्थीले बच्चा जन्माएकी छन् । पुर्वी रुकुमको तकसेरा र प्वाङ केन्द्रबाट सहभागी परीक्षार्थी हलमै सुत्केरी भएकी हुन् । तकसेरामा रेखा घर्तीले छोरा र प्वाङमा कविता बिकले छोरी जन्माएकी छन् ।

प्रश्नपत्र बितरण गरेलगतै सुत्केरी व्यथा लागेकी रेखाले केही समयमै छोरा पाएकी थिइन् । बच्चा जन्मिसकेपछि उनी परीक्षामा सहभागी भएकी थिइन् । उनलाई एक घण्टा समय थप गरी परीक्षामा सहभागी गराइएको प्रमुख जिल्ला अधिकारी कृष्ण प्रसाद अधिकारीले जानकारी दिए । कविताको भने स्वास्थ्य अवस्था कमजोर भएकाले उनका सहयोगीले परीक्षा दिएको उनले बताए । परीक्षाको दिन जन्मेकाले बच्चाहरुको नाम प्रवेशिका र प्रवेश राखिएको छ ।

यसैगरी रुकुमकै नुवाकोट परीक्षा केन्द्रमा अमर्यादित कार्य गरेको भन्दै तीन शिक्षक र तीन परीक्षार्थीलाई निष्काशन गरिएको छ ।

दाङमा ५ दृष्टिविहिन र तीन कैदीले परीक्षा दिइरहेका छन् । ११ हजार ९ सय ९ परीक्षार्थीमध्ये पहिलो दिन १ सय ५८ जना अनुपस्थित रहेको जिल्ला शिक्षा अधिकारी जीतबहादुर शाहले बताए ।

पूर्वाञ्चलबाट १ लाख २३ हजार परीक्षार्थी

आजदेखि सञ्चालित एसएलसी परीक्षामा पुर्वाञ्चल विकास क्षेत्रबाट एक लाख २३ हजार परीक्षार्थी परिक्षामा सामेल भएका छन् । पुर्वाञ्चलमा गत वर्ष भन्दा १४ हजार बढी परीक्षार्थी सामेल भएको क्षेत्रीय शिक्षा निर्देशनालय धनकुटाले जनाएको छ ।

नियमिततर्फ ९९ हजार १ सय ८ र एक्जेम्टेड समुहतर्फ २४ हजार ५६ परिक्षार्थी परीक्षामा सामेल भएका छन् ।

पूर्वाञ्चलका १ हजार ७ सय ६९ विद्यालयका विद्यार्थी परीक्षामा सामेल छन् । १६ जिल्लामध्ये नियमिततर्फ सबैभन्दा बढी मोरङ्बाट १९ हजार ३ सय २६ र सबैभन्दा कम सोलुखुम्बुबाट २ हजार १ सय ४९ परिक्षार्थी रहेको निमिक्त निर्देशक केवलीराम अधिकारीले जानकारी दिए । पुर्वाञ्चलमा यस वर्ष ४ सय २० परीक्षा केन्द्र निर्धारण गरिएको छ । परीक्षा मर्यादित रुपमा सञ्चालन गर्न निर्देशनालयले निर्देशन जारी गरेको र सबैजसो जिल्लामा अनुगमन गर्ने जनाएको छ ।

दुई निरीक्षक कारवाहीमा

परीक्षामा अनियमितिमा सघाएको आरोपमा तेह्रथुमको वसन्त उच्च मावी परीक्षा केन्द्रका दुई जना निरीक्षक निस्कासनमा परेका छन् । परीक्षा हल भित्र अमर्यादित गतिविधि गरेको र परीक्षार्थीलाई चिट चोराउन सहयोग गरेको भन्दै शिक्षा विभागका निर्देशक टेक नारायण पाण्डे संयोजकत्वको अनुगमन टोलीले परीक्षा सुरु भएको १५ मिनेट मै उनीहरुलाई परीक्षा केन्द्र वाट निस्कासन गरेको हो ।

अनुगमन टोलीले निरीक्षक कौशिला गुरुङ र जीतमाया लिम्वुलाई परीक्षा केन्द्र बाट निस्कासन गरेको हो ।

सर्लाहीमा नक्कली परिक्षार्थी पक्राउ

सर्लाही- एसएलसी परिक्षाको पहिलो दिन मंगलवार सर्लाहीको गड्हिया मावि केन्द्रबाट एकजना नक्कली परिक्षार्थी पक्राउ परेका छन् । अर्कोको नाममा परीक्षा दिइ रहेका हथिऔल गाबिस-२ का अभिषेककुमार सिंहलाई प्रहरीले पक्राउ गरेको हो ।

सिम्बल नम्बर १२२१२३८ आर भएका विकासबाबु सिंहको नाममा अभिषेकले परीक्षा दिएको भेटिएको गड्हिया इलाका प्रहरी कार्यालयका निरीक्षक जनकबहादुर शाहीले जानकारी दिए । परिक्षार्थीको प्रबेश पत्रमा समेत विकासको फोटो हटाएर अभिषेकको टाँसिएको प्रहरीले जनाएको छ । अभिषेकले आफू ११ कक्षामा अध्ययनरत रहेको प्रहरीलाई बताएका छन् । पक्राउ परेका अभिषेकलाई कानूनी कारबाही गरिने प्रहरीले जनायो ।

त्यसैगरी अनुगमन टोलीले गोडैता उच्चमावि केन्द्रमा नियम विपरित राखिएका २ निरीक्षक र एक परिचरलाई बर्खास्त गरेका छ । जिल्ला शिक्षा अधिकारी ठूलोबाबु दाहालले पहिलो दिनको परिक्षा अत्यन्त शान्तिपूर्ण र मर्यादित रुपमा सम्पन्न भएको बताए ।

ढिलो परिक्षा सुरु

पर्वतको दक्षिणी हुवास गाविसमा रहेको जनसेवा संस्कृति उच्च माध्यमिक विद्यालयमा १५ मिनेट ढिला गरेर एसएलसी परिक्षा सुरु भएको छ । ६ वटा विद्यालयको केन्द्र रहेको उक्त विद्यालयमा चेकजांचले गर्दा १५ मिनेट ढिलो गरेर परिक्षा सुरु भएको जिल्ला शिक्षा अधिकारी घनश्याम पौडेलले बताए । उनले अन्यत्र भने समयमै परिक्षा सुरु भएको जानकारी दिए ।