उत्तर कोरियाले तीन वर्ष यता पहिलो पटक संयुक्त राष्ट्रसंघका परमाणु निरिक्षकहरुलाई प्योङयाङ भ्रमणको निम्तो दिएको छ ।
उत्तर कोरियाका प्रमुख परमाणु वार्ताकार रि योङ हो ले अमेरिकासंग हालै भएको सहमति लागु गर्ने विषयमा छलफलका लागि निमन्त्रणा दिइएको बताएका छन् । तर निरिक्षकहरुको कामबारे भने स्पष्ट नपारिएको अन्तर्राष्ट्रिय परमाणु उर्जा एजेन्सीले जनाएको छ । उत्तर कोरियामा किम जोङ उनले शासन सम्हालेको तीन महिनापछि राष्ट्रसंघको टोलीलाई भ्रमणको निम्तो दिइएको हो ।
गत महिना मात्र उत्तर कोरियाले आफ्नो आणविक कार्यक्रम र लामो दुरीको मिसायल परिक्षण रोक्ने र बदलामा अमेरिकाले २ लाख ४० हजार टन खाद्यान्न सहयोग गर्ने सहमति भएको थियो । सहमति अनुसार उत्तर कोरियाले राष्ट्रसंघका अनुगमनकर्ताहरुलाई योङनोप परमाणु केन्द्र निरिक्षणको अनुमति दिने जनाएको थियो ।
तर हालै मात्र किम इल सुङको १०० औं जन्मदिनको अबसरमा क्षेप्यास्त्र प्रक्षेपण गर्ने जनाएपछि उत्तर कोरियाले अन्तर्राष्ट्रिय समुदायसंग गरेको सहकार्य शंकाको घेरामा परेको छ ।
चैत्र ७ गते, २०६८ मा प्रकाशित
