फिजीमा भारी बर्षापछि आएको बाढीमा परी दुई जनाको ज्यान गएको छ भने कयौं बिस्थापित भएका छन् । बाढीमा केही ब्यक्ति हराईरहेको अधिकारीहरुले जनाएका छन् ।
बाढीबाट फिजीको भिटी टापू निकै प्रभावित बनेको छ । सो टापूमा थुप्रै घर तथा सवारी साधनहरु डुबानमा परेका छन् ।
यातायात, बिजुली आपूर्ती बन्द हुनुका साथै टेलिफोन सेवा समेत अवरुद्ध बनेकाले हराईरहेकाहरुको खोजी कार्यमा अवरोध उत्पन्न भएको जनाएको छ ।
बाढी पिडीत जनतालाई सुरक्षित स्थानमा सारिएको छ । गत जनवरीमा मात्रै फिजीमा बाढीबाटै ११ जनाको मृत्यु भएको थियो भने त्यतिबेला क्षतिग्रस्त बनेका संरचनाको पुनर्निर्माण जारी रहेकै बेला अर्को बाढी आएकाले जनता त्रसित बनेका छन् ।
चैत्र १९ गते, २०६८ मा प्रकाशित
