सिरियामा युद्धविरामको समयसीमा शुरु हुनै लाग्दा सरकार र विद्राहीबीचको विवाद झनै बढ्दै गएको छ ।
यसले युद्धविराम योजना नै धरापमा परेको छ ।
मुलुकका विभिन्न क्षेत्रबाट सेना फिर्ता गर्नु अघि विपक्षीले हतियार त्याग्ने लिखित प्रत्याभूति सिरिया सरकारले खोजेपछि विद्रोहीले त्यसलाई अश्वीकार गरिदिएको छ । बरु हिंसा तीब्र बनेको छ ।
सरकारी सेनाले टर्कीको सीमामा ७० जना मानिस मारेको अधिकारकर्मीहरुले बताएका छन् ।
संयुक्त राष्ट्रसंघ र अरब लीगको छ बुँदे शान्ति योजनामा सिरियामा अप्रिल १० सम्म सबै पक्षबाट हिंसा रोक्ने र १२ अप्रिलबाट पूर्ण युद्धविराम लागु गर्ने उल्लेख छ ।
राष्ट्रसंघका पूर्व महासचिव कोफी अन्नानको मध्यस्थतामा तयार पारिएको शान्ति सम्झौताका लागि राष्ट्रपति असाद सहमत भएका थिए ।
सिरियामा एक वर्ष यता राष्ट्रपति असादको शासन विरुद्धको प्रदर्शनमा ९ हजारभन्दा बढी मानिस मारिइसकेका छन् ।
चैत्र २८ गते, २०६८ मा प्रकाशित
