फ्रान्सका नवनिर्वाचित राष्ट्रपति फ्राँस्वा ओलाण्डले अफगानिस्तानमा रहेका दुई हजार फ्रान्सेली सैनिकलाई सन् २०१२ को अन्त्यसम्ममा फिर्ता गर्ने घोषणा गर्नु भएको छ । उहाँले अब अफगानी सैनिक नै आफनो जिम्मेवारी पुरा गर्न सक्षम भएकाले आफना सैनिक फिर्ता गर्न लागेको प्रष्ट्याउनुभयो ।
बाँकी १३ सय सैनिकलाई फिर्ता गर्ने समय उहाँले तोक्नुभएको छैन । अनौपचारिक भ्रमण क्रममा अफगानिस्तानको काबुल पुग्नुभएका ओलाण्डले फ्रान्सेली सैनिकसँगको भेट र त्यहाँका राष्ट्रपति हमिद कारजाईसँगको छलफलपछि यस्तो घोषणा गर्नुभएको हो ।
अफगानिस्तानमा तैनाथ फ्रान्सेली सैनिकलाई फिर्ता बोलाउनेबारे उनीहरुलाई स्पष्ट पार्न काबुल आएको ओलाण्डको भनाई छ । फ्रान्सका पूर्व राष्ट्रपति निकोलस सार्कोजीले अफगानिस्तानमा तैनाथ रहेका आफना सैनिकलाई सन् २०१४ सम्ममा फिर्ता बोलाइसक्ने निर्णय उल्ट्याएर ओलाण्डले २०१२ को अन्त्यमै फर्काउने निर्णय लिनुभएको हो ।
अफगानिस्तानमा हाल करिब तीन हजार फ्रान्सेली सैनिक छन् ।
जेष्ठ १३ गते, २०६९ मा प्रकाशित
