– डीआर पन्त
डडेल्धुरा – डोटीको सिरसइन सिर्मा भन्ने ठाउँमा जिप दुर्घटना हुँदा १२ जनाको मृत्यु भएको छ । साजगार्डबाट सदरमुकाम सिलगढी जाँदै गरेको खचाखच भरिएको ना १ ज ३२६१ नम्बरको महिन्द्रा जीप सडकबाट ४ सय मिटर तल खसेको छ ।
जिल्ला प्रहरी कार्यालय डोटीका अनुसार बिहान ९:३० बजे दुर्घटना भएको हो ।
तीन जनाको घटनास्थलमै र अन्यको सिलगुढी जिल्ला अस्पताल ल्याउँदै गर्दा मृत्यु भएको डोटी प्रहरी प्रमुख डिएसपी भरत बोहरा जनाए । दुर्घटनाको कारण खुलेको छैन । जीपमा २२ जना सवार थिए । प्रहरीका अनुसार ४ महिला, ४ बालबाललिका र १ पुरुषको मृत्यु भएको छ । १३ जना घाइतलाई सुजङ अस्पतालमा पुर्याइएको छ ।
गम्भीरलाई हेलिकप्टरबाट नेपालगंज वा काठमाडौं पुर्याइएको छ । घट्नास्थलमा रहेका प्रहरी नायव निरीक्षक लोकेन्द्र सिंह कार्कीका अनुसार हालसम्म चार जनाको सनाखत भएको छ । त्यसमध्ये डोटी बगलेख गाविस १ का ३५ वर्षीया जनु विष्ट, पुडासैन ३ बस्ने ३४ वर्षीय टेकबहादुर ठक्कुला, काँडामाँडौ २ की २ वर्षीया रिया बोगटी, गैरा गाविस ३ बस्ने ३५ वर्षीया गोरी देवी खडका छिन् ।
जेष्ठ १७ गते, २०६९ मा प्रकाशित
