अमेरिकी मानवरहित ड्रोन विमान हमलामा अलकायदाका दोस्रो ठूला नेता मारिएको अमेरिकाले पुष्टी गरेको छ । पाकिस्तानको उत्तरी पश्चिमी क्षेत्रमा गत सोमबार गरिएको आक्रमणमा अलकायदाका वरिष्ठ नेता अबु याहया अल लिबीसहित १४ जना आतंकवादी मारिएको अमेरिकी अधिकारीहरुले पुष्टी गरेका हुन् ।
यद्यपी पाकिस्तानले भने लिबीको मृत्युबारे स्पष्ट पारेको छैन । अलकायदा प्रमुख ओसामा बिन लादेन मारिएपछि लिबीलाई आयमन अल जवाहरीपछिको दोस्रो ठूलो नेताको रुपमा मानिएको थियो । लिबी पाकिस्तानको प्रान्तीय क्षेत्रमा खटिएको बताइन्छ ।
सन् २००९ मा नै पाकिस्तानी हमलामा उनी मारिएको हल्ला चलेपछि उनले भिडियो टेप जारी गर्दै आफू जिउँदै रहेको प्रतिक्रिया दिएका थिए ।
पाकिस्तान सीमा नजिकैको प्रान्तीय क्षेत्र अलकायदा र तालिवान लडाकुको अखडा मानिन्छ ।
जेष्ठ २५ गते, २०६९ मा प्रकाशित
