चीनको दक्षिण पश्चिमी शहर शिफांगमा चर्को विरोध पछि तामा प्रशोधन संयन्त्र निर्माण कार्य स्थगित गर्न अधिकारीहरु बाध्य भएका छन् ।
तर उनीहरुले अवैध गतिविधि बन्द नगरे प्रदर्शनकारीहरुले गंभीर सजाय भोग्नु पर्ने चेतावनी पनि दिएका छन् । स्थानीयसंग छलफल पछि संयन्त्र निर्माण अगाडि बढाइने अधिकारीहरुले जनाएका छन् । वातावरण प्रदुषणको आशंकामा त्यस क्षेत्रका हजारौ जनता संयन्त्र निर्माणको विरोधमा उत्रिएका थिए ।
दुई दिन यताको विरोध प्रदर्शनका क्रममा धेरै सुरक्षाकर्मी र प्रदर्शनकारीहरु घाइते भएका छन् । प्रहरीले प्रदर्शनकारीहरुले गैरकानुनी रुपमा भेला भएर कानुन तोड्ने प्रयास गरेमा कारवाही गर्ने सुचना सार्वजनिक गरेको छ ।
चीनमा सरकारले निर्माण गर्ने योजनाको विषयमा विरोधका स्वरहरु कमै सुनिए पनि पछिल्लो समय भने स्वास्थ्य र वातावारणमा असर पु-याउने आयोजना निर्माणको व्यापक विरोध हुन थालेको छ ।
आषाढ़ २० गते, २०६९ मा प्रकाशित
