लिवियामा कर्णेल गद्धाफीको पतनपछि सम्पन्न पहिलो संसदीय निर्वाचनमा उदारवादी दलहरुको गठबन्धन नेशनल फोर्सेज एलायन्सले सबैभन्दा बढी सीटमा जीत हासिल गरेको छ ।
पूर्व अन्तरिम प्रधानमन्त्री महमुद जिब्रिलले नेतृत्व गरेको गठबन्धनले आरक्षित ८० सीट मध्ये ३९ सीटमा जीत हासिल गरेको हो । मुस्लिम ब्रदरहुडको राजनीतिक शाखाले १७ सीट जितेको छ । लिवियाको संसदमा २ सय सीटमध्ये बाँकी स्वतन्त्र उम्मेद्वारले जितेका छन् ।
युरोपेली चुनाव पर्यवेक्षकहरुले जुलाई सातमा सम्पन्न निर्वाचन सामान्यतया शान्तिपूर्ण रहेको जनाएका छन् । एक सय भन्दा वढी दलले भाग लिएको निर्वाचनमा ६२ प्रतिशत मतदाताले मतदान गरेका थिए । यो निर्वाचनलाई लिवियामा पछिल्लो दशकमा भएको स्वतन्त्र निर्वाचन भनिएको छ ।
सन् १९६९ मा सत्तामा आएका गद्धाफी गत वर्षको सफल जनविद्रोहपछि मारिएका थिए ।
श्रावण ३ गते, २०६९ मा प्रकाशित
