श्रावण १० गते, २०६९ मा प्रकाशितकाठमाडौं – नेपाली कांग्रेस एमाले नयाँ सरकार बन्ने टुंगो नहुँदासम्म नयाँ प्रधानमन्त्रीको उम्मेदवार को भन्ने सार्वजनिक नगर्ने सहमति गरेका छन् । सरकार बन्ने टुंगो नभई प्रधानमन्त्रीको उम्मेदवार तोक्नु ठिक नहुने भन्दै यस विषयमा सार्वजनिक टिकाटिप्पणी पनि नगर्ने निष्कर्ष निकालेका छन् ।
केही दिन यता एमाले नेताहरुले कांग्रेसले उम्मेदवार तय नगर्दा समस्या भएको उल्लेख गर्दै आँट नगर्ने हो भने एमालेले विकल्प दिने धारणा सार्वजनिक गरेका थिए । अध्यक्ष झलनाथ खनाल, वरिष्ठ नेताहरू माधवकुमार नेपाल र केपी ओलीले पनि पहिलो प्राथमिकता कांग्रेस नै भएको तर तयार नहुने हो भने एमालेले विकल्प दिने धारणा पार्टीका र सार्वजनिक कार्यक्रममार्फत अघि सारेका थिए ।
यसै सन्दर्भमा कांग्रेस नेताहरू सहमति, सरकार र आन्दोलन लगायतका विषयमा छलफल गर्न मंगलबार दिउँसो एमाले मुख्यालय बल्खु पुगेका थिए । बैठकमा दुई दलले सहमति निर्माण र नयाँ सरकार गठन लगायतका विषयमा बुधबार माओवादीसँग छलफल गर्ने भएका छन् ।
माओवादीसँगको छलफलपछि मात्र कसरी अघि बढ्ने टुंगो लगाउने बैठकपछि दुवै दलका नेताहरूले जानकारी दिए । ‘मुलुकलाई कसरी निकास दिने भन्ने सम्बन्धमा हाम्रो कुराकानी भएको हो, माओवादी अब कसरी अघि बढ्छ त्यसपछि मात्र हाम्रो राणनीति तय हुन्छ’ बैठकपछि कांग्रेस उपसभापति रामचन्द्र पौडेलले भने । उनले राजनीतिक सहमति नै नभएको अवस्थामा प्रधानमन्त्रीको उम्मेदवार तोक्नु आवश्यक नरहेको बताए ।
अन्य समाचारहरु
