पहिरोका कारण पृथ्वी राजमार्ग अबरुद्ध, सवारी साधन आवत जावतमा अबरोध

धादिङको बैरेनी गाविस ९ बैरेनी बजारमा बिहीबार राति गएको पहिरोका कारण पृथ्वी राजमार्ग अबरुद्ध भएको छ । पहिरोका कारण राति २ बजेदेखि सवारी साधन आवत जावतमा अबरोध भएको प्रहरीले जनाएको छ ।

ईलाका प्रहरी कार्यालय गजुरीका प्रहरी निरीक्षक बिनोद घिमिरेका अनुसार दुईतर्फी सवारीसाधन आवत जावत गर्नेगरी पहिरो खुलाउन तीन घण्टा लाग्ने छ । एकतर्फी सवारीसाधन सञ्चालनमा ल्याउन प्रयास भईरहेको छु उनले भने । पहिरोका कारण दुवैतर्फ ठूलो संख्यामा सवारी साधन रोकिएको छ । मुग्लिङनतर्फ करिव ६ किलोमिटर र काठमाण्डौतर्फ दुई किलोमिटर बराबर सवारी साधन जाममा परेको छ ।

काठमाण्डौं भित्रन लागेका रात्रि यातायात र काठमाण्डौबाट बाहिरिनुपर्ने दिवा सेवाका यातायात जाममा परेको छ । पहिरो हटाउनका लागि चार वटा डोजर लगाईएको छ । पहिरोमा ईन्डियाबाट आएको ट्रक र स्कारपियो कार फसेको छ । दुवै गाडी डोजर लगाएर निकाल्ने प्रयास भईरहेको निरीक्षक घिमिरेले बताए । उक्त ठाउँमा एक हप्ता अघि पनि पहिरो गएको थियो । पहिरोले नौ घण्टा सवारीसाधन अबरुद्ध भएको थियो ।

 

आज अघिल्लो पटकको भन्दा निकै ठूलो पहिरो छु निरिक्षक घिमिरेले भने ।   RSS