काठमाडौं । अर्घाखाँची डट्कमलाई प्राप्त समाचार अनुसार त्रिवि शिक्षण अस्पताल महाराजगञ्जको डीनमा डा. प्रकाश सायमी नियुक्त भएका छन् । वरिष्ठताको आधारमा पाँचौ स्थानमा रहेका सायमीलाई आज बसेको त्रिवि कार्यकारी परिषदको बैठकले डीनमा नियुक्त गरेको हो ।
डा. प्रकाश सायमी डीन नियुक्ति भएपछि वरिष्ठता र क्षमताका आधारमा डीन नियुक्ति हुनुपर्ने र राजनैतिक नियुक्ति अन्त्य हुनुपर्ने भन्दै विगत ६ दिनदेखि आमरण अनशनमा बसेका डा. गोविन्द केसीले अनशन तोडेका छन।
शिक्षण अस्पतालमा उपचार गर्न पुगेका विरामीले जसु खुवाएर केसीको अनशन तोडाएका थिए।
यसअघि आजै बिहान प्रधानमन्त्री डा. बाबुराम भट्टराईले सरोकारवालाहरुसँग छलफलगरी डीन नियुक्ति बरिष्ठताकै आधारमा गर्न सम्बन्धितपक्षलाई निर्देशन दिएका थिए ।
त्यस्तै शुक्रबार नै सायमी डीनमा नियुक्त भएको कुरा बाहिर आएपनि नेपाल चिकित्सक संघले त्यसलाई हल्ला मात्रैको संज्ञा दिएर आफूहरुको आन्दोलन यथावत रहेको जनाएको थियो । डीन नियुक्ति संगै देशभरका स्वास्थ्य संस्था बन्द गर्ने चिकित्सकहरुको आन्दोलन पनि स्थगित हुने बताइएको छ ।
भाद्र २ गते, २०६९ मा प्रकाशित
