सरकार अधिनायकवादी बाटोमा लागेको मसालका महामन्त्री मोहनविक्रम सिंहको आरोप

– नेकपा  मसालका महामन्त्री मोहनविक्रम सिंहले सरकार अधिनायकवादी बाटोमा अघि बढेको उल्लेख गर्दै राष्ट्रिय सहमतिको सरकार बनाएर नयाँ निर्वाचनमा जानुपर्ने मार्गचित्र प्रस्तुत गरेका छन् । ‘देशमा तानाशाही व्यवस्था लाद्ने उद्देश्यले नै एमाओवादीले सहमतिको सरकार गठन गर्न संविधानका विषयमा सहमति हुनुपर्ने पूर्वसर्त राखेको हो,’ आइतबार संवाददातासँगको भेटमा सिंहले भने, ‘विदेशी विस्तारवादी र जातिवादी शक्तिको समर्थनमा कामचलाउ सरकारलाई निरन्तरता दिने प्रयास भइरहेको छ । यो सरकार जति लम्बिन्छ, राष्ट्रिता र सार्वभौमिकता उतिनै खतरामा पर्छ ।’

कामचलाउ सरकारले राष्ट्रिय महत्त्वका निर्णय गर्न नसक्ने उल्लेख गर्दै सिंहले निर्वाचनसम्बन्धी अध्यादेश अस्वीकृत गर्ने राष्ट्रपतिको कदम उचित भएको जनाए । ‘यो सरकारलाई निरन्तरता दिनु भनेको अधिनायकवादी शासन निम्त्याउनु हो,’ उनले भने, ‘अध्यादेश अस्वीकार गर्ने राष्ट्रपतिको कदम स्वागतयोग्य छ ।’