कार्तिक २ गते, २०६९ मा प्रकाशितकाठमाडौं – बाघ संरक्षणबारे १३ वटा मुलुकका वन र वातावरण मन्त्रीस्तरीय सम्मेलन कात्तिक ४ देखि ८ सम्म भुटानको थिम्पुमा हुने भएको छ ।
सम्मेलनमा नेपालबाट वनमन्त्री यदुवंश झा, वन मन्त्रालयका सहसचिव हरिहर सिग्देल, वन विभागका महानिर्देशक ब्रजकिशोर यादव, राष्ट्रिय निकुञ्ज विभागका इकोलोजिस्ट महेश्वर ढकाल र बाघ संरक्षणमा काम गरिरहेको डब्लुडब्लुएफ नेपालका शिवराज भट्ट सहभागी हुनेछन् ।
सम्मेलनमा विश्व बैंकका उच्च अधिकारी, बाघ संरक्षणमा काम गर्ने संघ संस्था, विशेषज्ञ, दातृ निकायलगायतको सहभागिता रहनेछ । भुटान सरकारको आयोजनामा हुने उक्त सम्मेलनलाई विश्व बैंकअन्तर्गतको ‘बाघ बचाउ पहल’ (ग्लोबल टाइगर इनिसियटिभ) ले सघाएको छ । बाघ संरक्षणबारे बाघ पाइने मुलुकका वन/वातावरण मन्त्रीहरूको यो दोस्रो सम्मेलन हो । पहिलो सम्मेलन थाइल्यान्डमा भएको थियो ।
रसियाको पिटर्सबर्गमा २०१० मा भएको बाघ पाइने मुलुकका राष्ट्र प्रमुखहरूको सम्मेलनले बाघ संरक्षणका लागि ‘ग्लोबल टाइगर रिकोभरी प्रोग्राम’ (जीटीआरपी) घोषणा गरेको थियो । त्यही कार्यक्रमबारे मूल्यांकन गर्न र बाघ संरक्षणमा भइरहेका गतिविधिबारे चर्चा गर्न सम्मेलन हुन लागेको हो ।
बाघ संरक्षणका लागि सेन्ट पिटर्सबर्गमा जारी गरिएको १२ वर्षे रणनीतिबारे पनि छलफल हुनेछ ।
अन्य समाचारहरु
