अर्घा पुर्णिमाबाट फर्केर आउँदै गरेको सुरक्षा गाडी दुर्घटना, सिडिओ सहित सात घाईते

अर्घाखाँची – अर्घाखाँचीको अर्घा गाउँ विकास समिति वडा नं. ६ मसुरपाटामा भएको प्रधानमन्त्री बाबुराम भटराईको कार्यक्रमबाट सदरमुकाम तर्फ फर्कदै गर्दा पिक अफ भ्यान दुर्घटनामा परी प्रमुख जिल्ला अधिकारी सहित सात जना सुरक्षा अधिकारी घाईते भएका छन ।

 
 सदरमुकाम नजिकै अर्घा धरमपानी स्थित विद्युत कार्यालय नजिकै जिल्ला पशु सेवा कार्यालयको बा १ ज ५८५६ नम्बरको गाडी दुर्घटना हुँदा प्रजिअ गोविन्दमणी भुर्तेल चन्दनाथ गणका गणपति रामकाजी राना प्रहरी नायव उपरीक्षक हरि बहादुर पाण्डे राष्टिय अनुसन्धान डिएसपी लिलाधर पौडेल कार्यलय सहयोगी सुनिल पौडेल प्रहरी जवान टेक बहादुर थापा र गाडी चालक कृष्ण शाही घाईते भएका छन । गंभिर घाईते सुनिल पौडेल शाही र थापाको थप उपचारका लागि लुम्बिनी अञ्चल अस्पताल बुटवल रिफर गरिएको छ भने प्रजिअ भुर्तेल राना र पाण्डे उपचार पछि फर्किएका छन । लिलाधरको उपचार भैरहेको छ ।

 

तिव्र गतिमा आएको गाडी एककासी ब्रेक फेल भई भित्तामा ठोक्किएर दुर्घटना भएको गणपति रानाले बताए । 

 

दुर्घटना भएको स्थान समथर भएकाले बाटोमै पल्टिएकाले ठुलो क्षति हुनबाट बचेको प्रहरीले जनाएको छ । भुर्तेल र पाण्डेको टाउकोमा सामान्य ठक्कर लागेको छ ।