अमेरिकाको एक प्राथमिक स्कूलमा एक जनाले अन्धाधुन्ध गोली चलाउँदा २७ जना मारिएपछि शोकमा छ। कनेक्टीकट राज्यस्थित उक्त स्कूलमा बन्दूकधारीले चलाएको गोली लागेर मारिनेमा २० जना बालबालिका र ६ जना अरु व्यक्ति छन् । हत्यारा पनि मारिएका छन् ।
न्यूटाउनको सेन्डी हूक एलिमेन्टरी स्कूलमा गरिएको यो हत्या अमेरिकी इतिहासमै भएको सामूहिक हत्याकाण्ड मध्ये एक मानिएको छ । हत्याकाण्ड मच्चाउने अपराधी र हत्यामै संलग्न भएको आशंका गरिएका अर्का एकको पनि शव फेला परेको प्रहरीले जनाएको छ । सयौं राउण्ड गोली चलाइरहँदा बच्चाहरु रुवावासी गर्दै भाग्दै गरेको आफूहरुले देखेको प्रत्यक्षदर्शीले जनाएका छन् ।
अदाम नाम गरिएका २० वर्षे हत्याराले आफ्नी आमाले पढाउने स्कूल र कक्षालाई निशाना बनाएको हो । घटनामा आक्रमणकारीको आमा नान्सी लान्जा पनि मारिएकी छिन् । उक्त स्कूलमा पाँचदेखि दश वर्षका बालबालिका मात्र अध्ययन गर्दथे ।
घटनाबाट दुःखी बनेका अमेरिकी राष्ट्रपति बाराक ओबामाले देशलाई नै ठूलो धक्का लाग्ने यस्ता कृत्य हुन नदिन कडा कदम चाल्नुको विकल्प छैन भन्नुभयो । प्रेस सम्मेलनमै आँशु झार्दै देखिनुभएका ओबामाले मारिएका बालबालिकाको परिवारप्रति समवेदना व्यक्त गर्न आफूसँग कुनै शब्द नभएको र जस्तै शब्दले पनि घटनाको पीडा कम गर्न नसक्ने बताउनुभयो ।
यस घटनाले अमेरिकी नागरिकले बन्दूक राख्न पाउने कानूनी प्रावधानमाथि फेरि एक पटक बहस छेड्ने बताइएको छ । पाँच वर्ष अगाडि पनि भर्जिनियाको एक विश्वविद्यालयमा एक विद्यार्थीले ३२ जनाको यसैगरी हत्या गरेको थियो । गएको जुलाईमा कोलोराडोको एक सिनेमा घरमा एक जनाले गोली हानेर १२ जनाको हत्या गरेको थियो ।
– Agencies
मंसिर ३० गते, २०६९ मा प्रकाशित
