प्रधानन्यायाधीशको नेतृत्वमा चुनावी सरकार गठन गर्ने विषयमा आन्तरिक विवाद भएपछि नेकपा एमालले बोलाएको आकस्मिक स्थायी कमिटी बैठक स्थगित भएको छ । दिउँसो २ बजेका लागि बोलाइएको बैठक स्थगित भएको हो ।
स्थायी कमिटी बैठक अध्यक्षको सल्लाहअनुसार बोलाउनु पर्ने प्रावधान भए पनि वरिष्ठ नेता माधवकुमार नेपाल र महासचिव ईश्वर पोखरेलले बैठक आह्वान गर्नुभएको थियो । अध्यक्ष झलनाथ खनालले असहमति जनाएपछि बैठक स्थगित भएको हो ।
प्रधानन्यायाधीशलाई प्रधानमन्त्री बनाउने विषयमा केन्द्रीय समितिले प्रस्ताव पारित गरेदेखि नै एमालेभित्र देखिएको विवाद वरिष्ठ नेता माधवकुमार नेपाल विदेश भ्रमणबाट फर्किएसँगै विवाद थप चर्किएको छ ।
केन्द्रीय समितिका बहुमत सदस्यको असहमति हुँदाहँुदै पनि नेतृत्वले प्रधानन्यायाधीशलाई प्रधानमन्त्री बनाउन सहमति जनाएको भन्दै एमालेभित्र विवाद देखिएको थियो । प्रधानन्यायाधीशलाई चुनावी सरकारको नेतृत्व गर्न दिन नहुने विषयमा हिजो नेता नेपाल, महासचिव पोखरेल र सचिव शंकर पोखरेलले छलफल गरेका थिए ।
एमाले स्थायी कमिटीमा १३ जना सदस्य छन् ।
फाल्गुन ९ गते, २०६९ मा प्रकाशित
