नेपाल आदिवासी जनजाति महासंघले चार दलको इसारामा चुनाव हुन नसक्ने भन्दै तत्काल संविधान सभा पुनःस्थापना हुनुपर्ने मत राखेको छ । महासंघको वैशाख २८ गतेदेखि तीन दिनसम्म चितवनमा हुने आठौं महाधिवेशनबारे जानकारी दिन शनिबार राजधानीमा आदिवासी जनजाति पत्रकार संघ (अनिज) ले गरेको पत्रकार सम्मेलनमा यस्तो बताइएको हो ।
‘सम्पूर्ण आदिवासी जनजातिको अभियान, संविधान सभाबाट जारी गरौं पहिचानसहितको संघीय संविधान ‘ भन्ने नारासहित महासंघले सम्मेलन तयारी गरेको जनाएको छ । ‘चुनाव जालझेल मात्रै हो,’ पत्रकार सम्मेलनमा महासंघ अध्यक्ष राजकुमार लेखी थारूले भने, ‘चार दलका नेताको प्राइभेट लिमिटेडका कारण चुनाव सम्भव छैन । त्यसैले संविधान सभाको पुनःस्थापना गरी जातीय पहिचानसहितको संघीय संविधान जारी हुनुपर्छ ।’
लेखीले आफ्नो तीन वर्षे कार्यकालमा सिंगो आदिवासी जनजाति समुदायका मुद्दालाई झुक्न नदिएको र अरू दलको पिछलग्गु मात्र बनेर आदिवासीको अधिकार प्राप्ति नहुने स्पष्ट पारेको दाबी गरे । ‘आदिवासी जनजातिको मुद्दा समानता, अधिकार, पहिचानका निम्ति हो र त्यसको नेतृत्व महासंघले गरेको छ भनेर प्रमाणित गरेका छौं,’ विदेशी दाताको भरमा मात्र आदिवासी आन्दोलन भएको भ्रम चिरेको उल्लेख गर्दै उनले भने, ‘जातीय पहिचानसहितको संघीयता नचाहनेहरूले संविधान सभाबाट संविधान जारी हुन दिएनन् । अब पनि दिनेवाला छैनन् । त्यसैले संविधान सभा पुनःस्थापना एक मात्र विकल्प हो ।’
बैशाख १ गते, २०७० मा प्रकाशित
