भेनेजुएला । भेनेजुएलाको राष्ट्रपति निर्वाचनमा धाँधली भएको भन्दै विपक्षीहरु सडकमा उत्रेका छन् । नवनिर्वाचित राष्ट्रपति निकोलस माडुरोको पार्टीले धाँधली गरेर चुनाव जितेको भन्दै विपक्षी सडकमा उत्रेका हुन् । प्रदर्शनका क्रममा प्रदर्शनकारी र प्रहरीबीच झडप भएको छ । पूर्व राष्ट्रपति ह्यूगो चाभेजका उत्तराधिकारी मानिएका माडुरो झिनो मतअन्तरले राष्ट्रपतिमा चुनिएका थिए ।
माडुरोका पक्षमा ५० दशमलव ६६ प्रतिशत मत खसेको थियो । उहाँको निकटतम प्रतिष्पर्धी क्याप्रिलेसले ४९ दशमलव १ प्रतिशत मत प्राप्त गरेका छन् । परिणाम आएलगत्तैदेखि क्याप्रिलेसका समर्थक चुनावमा धाँधली भएकाले माडुरोलाई राष्ट्रपति नस्वीकार्ने भन्दै प्रदर्शनमा उत्रेका हुन् । निर्वाचन आयोगले भने नतिजा नफेरिने भन्दै माडुरोले यही अप्रिल १९ मा शपथ लिने जनाएको छ । नवनियुक्त राष्ट्रपति माडुरोले आफू कानूनी र संबैधानिक रुपमै विजयी भएको दावी गर्दै फेरि मतगणना गर्न विपक्षीलाई चुनौती दिएका छन् ।
agencies
बैशाख ३ गते, २०७० मा प्रकाशित
