काठमाडौं । मुक्त कमलरीहरुले कमलरी प्रथाको अन्त्य र मुक्त कमलरीहरुको उचित व्यवस्थापनको माग गर्दै आज सिंहदरबारको पूर्वी गेटमा धर्ना दिएका छन् । ललितपुरको कुपण्डोलस्थित एक घरमा कार्यरत कमलरीको रहस्मय मृत्यु भएपछि आन्दोलित बनेका मुक्त कमलरीहरुले हत्याको छानविन गर्न माग गरेका छन् ।
दुई दिनअघि सिंहदरबार घेराऊकै क्रममा कमलरीमाथि भएको प्रहरी दमनमा गृहमन्त्री जिम्मेवार रहेको भन्दै उनीहरुले गृहमन्त्रीको राजीनामा समेत मागेका छन् ।
कमलरीमाथि दमन गर्ने प्रहरीलाई बर्खास्त गर्नपनि उनीहरुले माग गरेका छन् । सिंहदरबार घेराऊ अघि कमलरीहरुले रत्नपार्कस्थित शान्तिबाटिकामा चार घण्टा धर्ना दिएका थिए ।
रासस
जेष्ठ २१ गते, २०७० मा प्रकाशित
