काठमाडौ – नेपाल विद्यार्थी संघको महाधिवेशन भदौ २८ देखि ३० गतेसम्म राजधानीमा हुने भएको छ । पार्टी सभापति सुशील कोइराला निवास महाराजगन्जमा बुधबार पदाधिकारी र नेविसंघ नेतृत्वबीचको छलफलले मिति तोकेको हो ।
संघका अध्यक्ष रञ्जित कर्णले असोज पहिलो सातामा मिति तोक्ने तयारी गरेका थिए । सभापति कोइरालाले त्यतिबेला संविधानसभा निर्वाचनका लागि उम्मेदवार मनोनयनको समय पर्ने र महासमिति बैठकले पनि भदौ मसान्तभित्र सबै भ्रातृ संस्थाको अधिवेशन सक्ने निर्णय गरेको स्मरण गराएपछि उक्त मिति तोकिएको हो ।
यसअघि पनि महाधिवेशन मिति दुई पटक तोकिए पनि आन्तरिक विवादका कारण स्थगित हुँदै आएको थियो । पार्टी संस्थापन पक्ष र वरिष्ठ नेता शेरबहादुर देउवा समूहबीचको टकरावका कारण पार्टी एकतादेखि नै संघको अधिवेशन हुन सकेको छैन ।
यसपालि देउवा समूहको समेत सहमतिमा मिति तोकिएको छ । नेविसंघका अध्यक्ष रञ्जित कर्णले विवाद नरहेकाले महाधिवेशन हुनेमा शंका नगर्न आग्रह गरे । ‘सहमतिका साथ मिति तय भएको छ । यसलाई औपचारिक रूपमा हामी केही दिनमै घोषणा गर्छौं,’ उनले भने, ‘अबको महाधिवेशनले नेविसंघलाई सक्रिय बनाउूछ र त्यसले संविधानसभा निर्वाचनमा समेत पार्टीलाई ठूलो ऊर्जा दिनेछ ।’
संघले यसअघि नै १९ जिल्ला अधिवेशन ४५ जिल्लामा क्षेत्रीय अधिवेशनसमेत सम्पन्न भइसकेकाले अब समस्या नरहेको बताए । देउवा समूहबाट विद्यार्थी नेता ऋषिकेशजंग साहले अब तोकिने महाधिवेशनमा कुनै समस्या खडा नहुने बताए । ‘चार- पाँचवटा जिल्लामा विवाद छ । त्यसलाई विघटन गरेर या छानबिन गरेर समस्या समाधान गर्दैछौं,’ उनले भने, ‘अधिवेशनमा केन्द्रबाट खटिएर जाने प्रतिनिधिले प्रक्रिया नपुर्याई जबर्जस्ती टाूसेमा त्यस्तो प्रतिनिधिलाई निलम्बन गर्ने सहमति भएकाले समस्या उब्जदैन ।’
RSS
आषाढ़ १३ गते, २०७० मा प्रकाशित
