आश्विन ३ गते, २०७० मा प्रकाशितकाठमाडौं । आर्थिक स्वतन्त्रताको दृष्टिकोणले नेपालको अवस्था झन् खस्किएको एक प्रतिवेदनले औंल्याएको छ । क्यानडास्थित सार्वजनिक नीति प्रतिष्ठान फ्रेजर इन्स्टिच्युटले विश्वका ८० मुलुकमा निष्पक्ष सार्वजनिक नीति प्रतिष्ठानसँग मिलेर तयार पारेको विश्व आर्थिक स्वतन्त्रताको प्रतिवेदन २०१३ ले नेपालको अवस्था खस्किएको देखाएको हो ।
नेपाल १ सय ५२ मुलुक मध्ये १ सय २५ औं स्थानमा झरेको छ । गत वर्ष १ सय ४४ मुलुक मध्ये नेपाल १ सय १० औं स्थानमा थियो । यस वर्ष सार्वजनिक गरिएको प्रतिवेदनमा सन् २०११ को तथ्यांक प्रयोग गरिएको हो । यो तथ्यांकले सन् २०११ को प्रतिनिधित्व गरेको हो ।
सरकारको आकार बढ्नु र अन्तर्राष्ट्रिय रुपमा व्यापार गर्ने स्वतन्त्रतामा कमी आएकाले आर्थिक सूचांकमा नेपाल तल झरेको प्रतिवेदनमा भनिएको छ । नेपालमा सन् २०११ मा बाबुराम भट्टराईको नेतृत्वमा एकीकृत माओवादीको सरकार रहेको थियो ।
तथ्यांक मापन गर्दा सरकारको आकार, कानूनी संरचना तथा सम्पत्तिमाथिको अधिकारको सुरक्षा, असल मुद्रा माथिको पहुँच, अन्तर्राष्ट्रिय व्यापार गर्नका लागि स्वतन्त्रता र कर्जा, श्रम र व्यापार सम्बन्धी कानूनलाई आधार मानेर प्रतिवेदन तयार पारिएको हो ।
प्रतिवेदनले हङकङलाई विश्वमा सबैभन्दा बढी आर्थिक स्वतन्त्रता भएको मुलुक घोषित गरेको छ । विश्वमा बुधबार एकै पटक सार्वजनिक गरिएको यो प्रतिवेदन नेपालमा नेपाल उद्योग वाणिज्य महासंघ, नेपाल आर्थिक पत्रकार समाज (सेजन) र समृद्धि फाउण्डेशनले संयुक्त रुपमा सार्वजनिक गरेका हुन् ।
अन्य समाचारहरु
